Ministria e Punëve të Brendshme të Kosovës (MPB) ka bërë të ditur se pas ndërprerjes së pajisjes së qytetarëve me dokumente personale për shkak të një problemi, sot është evituar ky problem.

Sipas njoftimit të MPB-së, nga sot e tutje të gjithë qytetarët që kanë nevojë për pajisje me dokumente personale mund të drejtohen në Agjencinë e Regjistrimit Civil, shkruan arbresh.info.

“Ministria e Punëve të Brendshme përkatësisht Agjencia e Regjistrimit Civil, njofton të gjithë qytetarët e Republikës së Kosovës se nga e Hëna – datë 1 gusht 2022 ka pasur avari njëra nga pajisjet për personalizim të dokumenteve gjë që e ka pamundësuar pajisjen me dokumente personale për qytetarët. Pas angazhimit tre ditor të personelit teknik të Departamentit të Prodhimit të Dokumenteve në kuadër të Agjencisë së Regjistrimit Civil, sot është riparuar pajisja dhe menjëherë ka filluar procedimi i dokumenteve personale”, thuhet në njoftim.

Gjithashtu, Ministria e Punëve të Brendshme njofton të gjithë qytetarët që zyrtarët e Agjencisë së Regjistrimit Civil janë duke punuar deri në orët e vona për të përmbushur kërkesat e qytetarëve.

MPB shpreson në mirëkuptimin e qytetarëve./arbresh.info/